AUM puurNamadaH puurNamidaM puurNaat.h puurNamudachyate .
puurNasya puurNamaadaaya puurNamevaavashishhyate ..
 
       AUM shaa.ntiH shaa.ntiH shaa.ntiH ..
 
       .. atha iishopanishhad.h ..

AUM iishaavaasyamid.h.N sarvaM yatkiJNcha jagatyaaM jagat.h .
tena tyaktena bhuJNjiithaa maa gR^idhaH kasyasviddhanam.h .. 1..
 
kurvanneveha karmaaNi jijiivishhechchhataM samaaH .
evaM tvayi naanyatheto.asti na karma lipyate nare .. 2..
 
asuryaa naama te lokaa andhena tamasaa.a.avR^itaaH .
taa.nste pretyaabhigachchhanti ye ke chaatmahano janaaH .. 3..
 
anejadekaM manaso javiiyo 
         nainaddevaa aapnuvanpurvamarshhat.h .
taddhaavato.anyaanatyeti tishhThat.h
         tasminnapo maatarishvaa dadhaati .. 4..
 
tadejati tannaijati tadduure tadvantike .
tadantarasya sarvasya tadu sarvasyaasya baahyataH .. 5..
 
yastu sarvaaNi bhuutaanyaatmanyevaanupashyati .
sarva bhuuteshhu chaatmaanaM tato na vijugupsate .. 6..
 
yasminsarvaaNi bhuutaanyaatmaivaabhuudvijaanataH .
tatra ko mohaH kaH shoka ekatvamanupashyataH .. 7..
 
sa paryagaachchhukramakaayamavraNa\-
     masnaaviraM shuddhamapaapaviddham.h .
kavirmaniishhii paribhuuH svayambhu\-
     ryaathaatathyato.arthaan.h 
	     vyadadhaachchhaashvatiibhyaH samaabhyaH .. 8..
 
andhaM tamaH pravishanti ye.avidyaamupaasate .
tato bhuuya iva te tamo ya u vidyaayaaM rataaH .. 9..
 
anyadevaahurvidyayaa.anyadaahuravidyayaa .
iti shushruma dhiiraaNaaM ye nastadvichachakshire .. 10..
 
vidyaaM cha avidyaaM cha yastadvedobhayaM saha .
avidyayaa mR^ityuM tiirtvaa vidyayaa.amR^itamashnute .. 11..
 
andhaM tamaH pravishanti ye.asambhuutimupaasate .
tato bhuuya iva te tamo ya u sambhuutyaaM rataaH .. 12..
 
anyadevaahuH sambhavaadanyadaahurasambhavaat.h .
iti shushruma dhiiraaNaaM ye nastadvichachakshire .. 13..
 
sambhuutiM cha vinaashaM cha yastadvedobhayaM saha .
vinaashena mR^ityuM tiirtvaa sambhutyaa.amR^itamashnute .. 14..
 
hiraNmayena paatreNa satyasyaapihitaM mukham.h .
tattvaM puushhannapaavR^iNa satyadharmaaya dR^ishhTaye .. 15..
 
puushhannekarshhe yama suurya praajaapatya
     vyuuha rashmiin.h samuuha tejaH .
yatte ruupaM kalyaaNatamaM tatte pashyaami 
     yo.asaavasau purushhaH so.ahamasmi .. 16..
 
vaayuranilamamR^itamathedaM bhasmaa.ntaM shariiram.h .
AUM krato smara kR^itaM smara krato smara kR^itaM smara .. 17..
 
agne naya supathaa raaye asmaan.h 
     vishvaani deva vayunaani vidvaan.h .
yuyodhyasmajjuhuraaNameno 
     bhuuyishhThaaM te nama{}uktiM vidhema .. 18..
 
      .. iti iishopanishhad.h ..
 
AUM puurNamadaH puurNamidaM puurNaat.h puurNamudachyate .
puurNasya puurNamaadaaya puurNamevaavashishhyate ..
 
      AUM shaa.ntiH shaa.ntiH shaa.ntiH ..